มาแล้วครับเรื่องย่อ วรรณกรรมสินไซ (เวอร์ชั่น ภาษาอีสาน) มาลองอ่านดูครับ       

  
            โดนมาแล้ว ในนครเป็งจาลมีพระราชาซื่อว่า พระยากุศราช พระยากุศราชเพิ่นกะมีมเหสีเอกซื่อนางจันทา พระยากุศราชเพิ่นกะมีน้องสาวหล่าซื่อนางสุมณฑา นางสุมณฑามีฮูบฮ่างหน้าตางดงามหลายผู้คนในนครเป็งจาลกะมีความสุขสำบาย

           กล่าวเถิงยักษ์ฮ่ายตนหนึ่งซื่อยักษ์กุมภัณฑ์ ยักษ์กุมภัณฑ์เป็นยักษ์ขี้ดื้อ มักเดินทางไปเทียวยังที่ต่างๆ มื้อหนึ่งยักษ์กุมภัณฑ์แปลงกายเป็นแมงวัน โตหนึ่ง บินออกเทียวจนมาเถิงเมื่องเป็งจาล

           พอเห็นนางสุมณฑาก็ลัก หลงมักหลงฮักนางแฮง กะเลยลักอุ้มเอานางหนีกลับบ้านกลับเมื่องของตน พระยากุศราชพอฮู้ว่ายักษ์มาลักเอานางเจ้าของ กะเลยโศกเศร้าและคึดฮอดน้องสาวหลายหลายจั่งตัดสินใจออกบวชเพื่อติดตามหาน้องสาว

           พระยากุศราช เมื่อออกเดินทางไปยังที่ต่างๆ กะหาน้องสาวบ่พ่อ  จนมาเถิงบ้านพ่อเศรษฐี  พ่อเศรษฐีเพิ่นมีลูกสาวทั้งเหมิดเจ็ดนาง ล้สวนแต่เป็นคนจบๆ งามๆ พอพระยากุศราชมาพ่อ กะเลยหลงมักหลงฮักลูกสาวทั้งของพ่อเศรษฐี จั่งกลับเมืองเป็งจาล กะเลยลาสิก แล้วให้ทหารไปสู่ขอลูกสาวทั้งเจ็ดของพ่อเศรษฐี พ่อเศรษฐีดีใจหลาย จั่งยกนางทั้งเจ็ดให้ไปเป็นเมียของพระยากุศราช เป็นอันว่า พระยากุศราชมีเมียทั้งเหมิดแปดคนนำกัน

          อยู่กันมาโดน พระยากุศราชกะบ่มีลูกจักเทีย กะเลยให้เมียทั้งแปดไปขอลูกกับอินตาเทวราช 

          เมื่ออินตาเทวราชเห็นจั่งให้เทวดาผู้มีบุญญาธิการมาเกิด  เทวดาองค์ตำอิดลงมาเกิดในท้องของนางจันทา นางจันทา ออกลูกเป็นสิงห์ชื่อให้ว่า สีโห

          เทวดาอีกสององค์มาเกิดในท้องนางลุนผู้เป็นลูกสาวคนสุดท้ายของเศรษฐี นางลุนออกลูกเป็นฝาแฝด คนตำอิดออกมามีพระขรรธ์ออกมานำ จั่งตั้งชื่อให้ว่า สินไซ  คนที่สองออกมาเป็นหอยสังข์ จั่งให้ชื่อว่า สังข์ทอง  ส่วนลูกสาวอีกหกนางที่หลือของพ่อเศรษฐีออกลูกเป็นคนธรรมดา บ่มีอิทธิฤทธิ์อีหญัง

         เมียทั้งหกย่านลูกชายของนางจันทาและนางลุนได้ครอบครองเมืองเพราะมีอิทธิฤทธิ์ จั่งรวมหัวกันบังคับให้โหร ทูลแก่พระยากุศราชว่า ลูกทั้งสามของนางจันทาและนางลุน เป็นเสนียดจังไฮแก่บ้านแก่เมือง  พนะยากุศราชฮู้จั่งซั่นกะเซื่อคำเมียน้อย จั่งให้ทหารขับไล่นางจันทากับนางลุนพร้อมลูกทั้งสามออกจากบ้านจากเมือง พอเทวดาเห็นกะเลยเสกบ้านให้อยู่กลางป่า จนลูกทั้งสามใหญ่เป็นบ่าว

         ลูกชายทั้งหกของพระยากุศราชกะใหญ่เป็นบ่าวคือกัน พระยากุศราชเองกะยังคึดฮอดน้องสาวหล่าเจ้าของอยู่ กะเลยให้ลูกซายทั้งหกออกตามหาอาให้พ่อ และพากลับบ้านกลับเมืองเป็งจาล

        ท้าวทั้งหกเดินทางเข้าปา จนมาพ่อสินไซ สังข์ทอง และสีโห ทั้งเก้ากุมารคุยกันไปคุยกันมาจั่งฮู้ว่าเป็นพี่น้องกัน หกกุมารดีใจหลาย เลยพากันวางแผนหลอกใช้สินไซให้ไปตามอานำ

        สินไซ สังข์ทอง และสีโห พร้อมกับท้าวทั้งหกกะเดินดง ตามหาอา สินไซ สินไซ สังข์ทอง และสีโห บ่ย่านอีหญัง เพราะมีอิทธิ์หลาย ท้าวทั้งหกย่านกะเลยย่างนำก้น

       สินไซย่างต่ออีก ไปพ่อยักษ์ป่า กะได้เร็วกับยักษ์ป่า จนยักษ์ป่าตาย

      สินไซย่างต่ออีก ไปพ่อซ่างสี่โต สินไซกะเร็วกับซ่าง จนซนะซ้าง

      สินไซย่างต่ออีก ไปพ่อต้นไม้ออกหน่วยเป็นแม่หญิงซื่อต้นนารีผล สินไซกะเร็วกับวิทยาธร เพื่อยาดนารีผลกันจนสินไซซนะ สินไซมักนารีผล จั่งได้นางนารีผลเป็นเมีย

      สินไซอยากพ่ออาแฮงกะเลยย่างต่ออีก ไปพ่อกินรี สินไซมักนางกินรี จั่งได้นางกินรีเป็นเมีย   สินไซอยากพ่ออาแฮงกะเลยย่างต่ออีก ไปจนพ่อเมืองยักษ์ 

     เทื่อนั้น ยักษ์กุมภัณฑ์กะออกไปหากินบ่อยู่ในเมือง สินไซกะไปบอกข่าวให้นางสุมณฑาฮู้ และเซิญนางสุมณฑากลับเมืองเป็งจาล นางสุมณฑากะบ่อยากกลับเพราะมาอยู่กับยักษ์โดน นางกะหลงมักยักษ์แล้ว สินไซพยายามให้อากลับนำเพราะถ้าอากลับพระยากุศราชสิอภัยให้แม่จันทากับแม่ลุนตามคำบอกของท้าวทั้งหก

       พอดียักษ์กุมภัณฑ์กลับมา จั่งได้เร็วกับสินไซ บ่มีไผแพ้บ่มีไผชนะ  สินไซเลยไปนำสีโหมาซ่อย สีโหฮ้อง เที่ยเดียวยักษ์กะอยากไล่ สีโหฮ้องกระดานหูยักษ์แตกตาย เป็นอันว่า การเร็วกันเที่ยนี้ สินไซซนะ

       นางสุมณฑากะเลยยอมกลับนำสินไซ สินไซพาอากลับเมืองเป็งจาล นางสุมณฑาเว้าเรื่องราวให้พระยากุศราชฟังทั้งเหมิด พระยากุศราชจั่งให้ไปเซิญนางจันทา นางลุนกลับเข้าเมืองเป็งจาลอย่างมีความสุขตั้งแต่นั้นเป็นต้นมา

      นิทานเรื่องนี้กะจบแล้ว

 เรียบเรียงโดย.… สำรวย เย็นเฉื่อย  ( ๒๕๔๕)

ความหมายของคำศัพท์ในเรื่อง

โดน ——– นาน

มีน้องสาวหล่า ———– มีน้องสาวคนสุดท้อง

มีฮูบฮ่าง ————- มีรูปร่าง

ฮ่าย ————- ร้าย

ขี้ดื้อ ————- เกเร ซุกซน

แมงวัน ———— แมลงวัน

ลาสิก ———— ลาสิกขา (ออกจากการเป็นพระ หรือพราหมณ์)

ทั้งเหมิด ———- ทั้งหมด

จักเทีย ———— สักครั้ง

กะบ่ ———— ก็ไม่

จั่ง ——— ก็เลย

อีหญัง ——– อะไร

ย่าน ———– กลัว หวาดกลัว

โหร ———— โหราศาสตร์

เสนียดจังไฮ ————- เป็นพิษเป็นภัย กาลกิณี ไม่เป็นมงคล

ฮู้จั่งซั่น —————- รู้อย่างนี้แล้ว

บ่าว ————– หนุ่ม

ย่างนำก้น ————– เดินตามหลัง

บ่ย่านอีหญัง ————- ไม่กลัวอะไร

กะได้เร็ว ———— ก็ได้ต่อสู้กัน

ออกหน่วย ———— ออกผล

แก้ไขเพิ่มเติมโดย ธนชิต  ผิวขำ (2553)

Related posts

• ฮูปแต้มสินไซ จาก วัดสนวนาราม อ.บ้านไผ่ จ.ขอนแก่น
• ภูมิหลังวรรณกรรมเรื่องสินไซ — โดย กำบี้
• คนรุ่นใหม่กับการสืบสานวรรณกรรมสินไซ
• ประวัติวรรณกรรมสินไซ เวอร์ชั่น เคลื่อนไหวได้
• เรื่องราว สินไซ (คัดย่อ เวอร์ชั่น ภาษาไทย) — โดย กำบี้
• สินไซ ฮูปแต้มใจชุมชนสาวะถี วัดไชยศรี
• กาพย์กลอน “สังสินไซ” ฉลอง 450 ปี นครหลวงเวียงจันทน์ สปป.ลาว
• ทต.สาวะถีร่วมกับวัดไชยศรีและสำนักวัฒนธรรม ม.ขอนแก่น จัดงาน “บุญข้าวจี่สินไซ” อนุรักษ์ประเพณีบุญเดือน 3 ของชาวอีสาน — ขอนแก่น